இனிமேல் 'F' தமிழ் எழுத்து?

தமிழர்கள் Form, Friend, Fan, Firefox, Frame, Photo, Phenol போன்ற எண்ணற்ற ஆங்கிலச் சொற்களை அன்றாட வாழ்வில் புழங்குகிறோம். ஆனால், மற்ற இந்திய, இலத்தீன-கிரேக்க-ஐரோப்பிய மொழிகளைப் போல் F ஒலியைத் தமிழில் எழுதிக் காட்ட இயலாதது பெரும் குறை.

தொல்காப்பியம், நன்னூல் எழுதியோர் வெளிநாடு சென்ற கடவுச்சீட்டு ஆதாரங்கள் கிடைக்கவில்லை. எனவே, அக்காலத்தில் F அறிமுகம் ஆகாமல் இருந்திருக்கலாம். எனினும், காலம் காலமாக அடுப்பு, சுருட்டு பற்ற வைத்து நெருப்பை அணைக்கும் போது, தமிழர்கள் அனைவரும் ‘foo… foo’ என்றே ஊதுகின்றனர். தற்காலத்திலும், குடித்து விட்டு சாலையில் வருகையில் காவலர்கள் மறித்து ஊதிக் காட்டச் சொன்னால் ‘foo… foo’ என்றே ஊதுகின்றனர். இதில் இருந்து F ஒலி தமிழர்களுக்கு அறிமுகமானதே என்று அறியலாம்.

>>தொடர்ந்து படிக்க இங்கே சொடுக்கவும்

• நன்றி:- ரவி

கிரந்தக் கிறுக்கர்கள் சிந்தனைக்கு...

தமிழ் இணைய உலகில் தமக்கெனத் தனியொரு சிறப்பிடத்தைப் பிடித்துள்ள ஐயா.இரவி சங்கர் அவர்கள் தம்முடைய வலைப்பதிவில் எழுதியுள்ள இந்த இடுகையை, மலேசியத் தமிழர்கள் கண்டிப்பாகப் படித்திடவேண்டும் என்ற நோக்கத்தில் திருத்தமிழில் வெளியிடுகின்றேன். -சுப.நற்குணன்

கிரந்த எழுத்துப் பயன்பாடு குறித்து சிந்திக்கையில் எழும் எண்ணங்கள்:

**thamiழ், thiruஞaanasambandhar, vaள்ள்i, faன், hஆட், jஓக், shஅவர், பs என்று எழுதுவதற்கும் விஜய், ஹாரி, ஜெய் என்று எழுதுவதற்கும் என்ன வேறுபாடு? ஆங்கிலத்தோடு தமிழ் கலந்து எழுதுவது உறுத்துகிறது, பிழை என்றால் கிரந்தத்தோடு தமிழ் கலந்து எழுதுவது மட்டும் ஏன் உறுத்த வில்லை? பழகிப் போவதால் ஒரு பிழை சரியாகுமா?

**டாய்ட்ச், நெதர்லாந்து மொழிகளில் ஜ ஓசை இல்லை. ramanujan என்று எழுதினால் ராமானுயன் என்று தான் வாசிப்பார்கள். அது அவரை மரியாதைக் குறைவாகச் சொல்கிறார்கள் என்று ஆகுமா? தமிழில் இராமானுசன் என்று எழுதினால் மட்டும் ஏன் மரியாதைக் குறைவு என்று நினைக்கிறார்கள்? thamil என்று கூட எழுதாமல் tamil என்று ஆங்கிலேயர் எழுதுவது தமிழரை அவமதிப்பதாகுமா? கிரந்தம் கலந்து ஒலிப்பு பிசகாமல் எழுதி ஒருவரைக் காறித் துப்பவும் முடியும். கிரந்தம் தவிர்த்து எழுதி ஒருவரைப் போற்றவும் முடியும். ஒருவரைப் போற்றவோ தூற்றவோ ஒலிப்பு ஒரு பொருட்டே இல்லை.

**இந்து, பௌத்த, இன்னும் பல சமய மந்திரங்களின் ஒலிப்பில் மந்திர ஆற்றல் உள்ளதாகவும் அதைக் காக்க கிரந்தம் அவசியம் என்றும் சொன்னால், சீன, சப்பானிய மொழிகளில் இந்த ஒலிப்புகளுக்குத் தொடர்பே இல்லாமல் இம்மந்திரங்கள், பெயர்களைச் சொல்லி வழிபடுகிறார்களே? அவர்களுக்கு அருள் கிடைக்காதா? கிரந்த எழுத்துகளே கலக்காமல் பாடல் பாடிய நாயன்மார்கள், ஆழ்வார்கள் வீடுபேறு அடையவில்லையா? பக்திக்கு ஒலிப்பு எவ்விதத்தில் முக்கியமாகிறது? மொழியின் இயல்பு காரணமாகவோ கவனக் குறைவு காரணமாகவோ இயலாமை காரணமாகவோ ஒருவர் ஒலிப்புப் பிசகிப் பேசினாலும் பாடினாலும் பக்தனின் உள்ளத்தை அறிந்து அருள இயலாத மூடரா கடவுள்? ஒரு கடவுளுக்குப் பல அவதாரங்கள், ஒவ்வொரு அவதாரத்துக்கும் பல பெயர்கள், ஒவ்வொரு மொழி, நாட்டிலும் ஒவ்வொரு ஒலிப்பு என்று இருக்கையில் ஒரு கடவுளின் பெயரை ஒலிப்பு கெடாமல் எழுதுவது அவசியமா? கண்ணன், திருமகள் என்று கிரந்த எழுத்துத் தேவையின்றி பிற மொழிச் சமயப் பெயர்களையும் தமிழாக்கிக் கூட எழுதலாமே? எல்லாம் கடந்த ஒரு ஓசையில் தான் தங்கி இருக்கிறாரா? ஒலிப்பை மாற்றிச் சொன்னால் மதிப்புக் குறைவு என்று கோபப்படுவரானால், பக்கத்துத் தெரு அரசியல்வாதிக்கும் கடவுளுக்கும் அவரது தூதர்களுக்கும் என்ன பெரிய வேறுபாடு?

**கிரந்தம் கலக்காமல் தமிழ் எழுத்துகளில் மட்டும் எழுத வேண்டும் என்று சட்டம் இல்லை. அதே போல், கிரந்தம் கலந்து தான் எழுத வேண்டும் என்றும் சட்டம் இல்லை. தமிழ் இலக்கணப் படி பள்ளியில் சொல்லித் தரப்பட்ட தமிழ் எழுத்துகளை மட்டும் கொண்டு எழுதுவதற்கு எவருக்கும் முழு உரிமை உண்டு.

**“தமிழ் இயல்புக்கு ஏற்ப ஒலிகளை உள்வாங்கியும் கிரந்தத் தவிர்த்தும் எழுதுவது தங்களை, தங்கள் நம்பிக்கைகளை அவமதிப்பதாகும்” என்று எவரும் சொல்வது ஒரு தொன்மையான இனத்தின் தன்மானத்துக்கு விடப்படும் நேரடி மிரட்டலாகும்.

**தமிழில் எழுதும் போது தமிழ் ஒலிகளை மட்டும் பயன்படுத்துங்கள் என்று தமிழரிடம் வேண்டுவது எவ்வாறு தமிழ்த் திணிப்பாகும்?

**பிற மொழி ஒலிப்புகள், அதை எழுதுவதற்கான தேவை ஏதோ புதிதாய் எழுந்தது இல்லை. தொல்காப்பியக் காலத்தில் தமிழருக்கு பிற மொழி, வட மொழியனருடன் தொடர்பு உண்டு. அதனாலேயே அச்சொற்களை எப்படி ஆள்வது என்று இலக்கணம் இயற்றப்பட்டது. வரலாற்றுக் காலம் நெடுகிலும் உலகம் முழுக்க வணிகத் தொடர்புகளைத் தமிழர் கொண்டிருந்திருக்கின்றனர். இத்தனை காலமும் கிரந்தம் இன்றி இருக்க வல்லதாய் இருந்த தமிழுக்குத் தற்போது மட்டும் கிரந்தத்தின் தேவை என்ன?

**புஷ்பா, ஹரீஷ் என்று எழுதினாலும் எங்கள் ஊர்க்காரர்களுக்கு புசுப்பா, அரீசு என்றே அழைக்க வருகிறது. அதை ஏன் புசுப்பா, அரீசு என்றே எழுதி விட்டுப் போகக்கூடாது? சார்ச்சு புசு, சாக்கி சான் என்று எழுதினாலும் அவர்கள் யாரும் நம்மோடு சண்டைக்கு வரப் போவதில்லை. அவர்களே கண்டு கொள்ளாத போது நாம் ஏன் விழுந்து விழுந்து ஒலிப்புத் துல்லியம் காட்ட வேண்டும்? கிரந்த ஒலிகள், எழுத்துகள் தேவைப்படுவோரைக் காட்டிலும் அவற்றின் தேவையின்றி வாழும் தமிழர் எண்ணிக்கை மிகக் கூடுதல். கிரந்தத்தை வலியுறுத்துவது தான் அவர்கள் மேலான உண்மையான திணிப்பு.

**கிரந்த எழுத்துகளைப் பொது ஊடகங்களில் பயன்படுத்துவது என்பது ஒரு சிலர் முடிவு எடுத்த, ஒருவரைப் பார்த்து இன்னொருவர் கண்மூடித்தனமாகப் பின்பற்றிய மரபு. கிரந்த எழுத்துப் பயன்பாடு என்பது திறந்த முறையில் மொழியிலாளர்களைக் கலந்துரையாடி எடுக்கப்பட்ட இறுதி முடிவு அல்ல. கிரந்த எழுத்து அறிமுகத்தில் பிற மொழி, சமய, இனத்தினர் நலமே மிகுந்துள்ளதே தவிர தமிழ், தமிழர் நலம் காக்கப்பட்டதாகத் தெரியவில்லை.

**அச்சூடகங்களைக் காட்டிலும் இணைய ஊடகத்தில் ஒலிப்பைச் சுட்ட எழுத்துகளின் தேவை குறைவு. ஒலிக்கோபுகள் மூலமே ஒலிப்பை எளிதாகச் சுட்ட முடியும். வருங்காலம் முழுக்க முழுக்க இணைய மயமான உலகாக இருக்கும் என்பதால் ஒலிப்பைக் கற்பதற்கு எழுத்துகளை மட்டும் தங்கியிருக்கத் தேவை இல்லை.

**ஆங்கிலத்தில் 26 எழுத்துகள் மட்டும் இருப்பது கற்றுக் கொள்ள குழந்தைகளுக்கு இலகுவாக இருப்பதாகவும் தமிழில் 247 எழுத்துகள் இருப்பது சிரமமாக இருப்பதால் அதைக் குறைத்து எழுத்துச் சீர்திருத்தம் செய்ய வேண்டும் என்றும் சொல்பவர்கள் மேற்கொண்டும் கிரந்த எழுத்துகளுக்காக (ஸ, ஷ, ஜ, ஹ, க்ஷ, ஸ்ரீ) 66 மேலதிக எழுத்துகளைக் கற்கச் செய்வது ஏன்?

**பல நாடுகள், சமயங்கள் தோன்றுவதற்கு முன்பே தமிழ் தோன்றியது. பல நாட்டினரும் பல சமயத்தினரும் தமிழ் பேசுகின்றனர். ஒரே பிறப்பில் நாட்டையும் சமயத்தையும் ஒருவர் மாற்றிக் கொள்ள முடியும். ஆனால், தாய்மொழியை மாற்றிக் கொள்ள இயலாது. எனவே, நாடுகள், சமயங்களைக் காட்டிலும் மொழி பெரிது என்று கருதாவிட்டாலும், அவற்றுக்குத் தருவதற்கு ஈடான மதிப்பை மொழிக்கும் தர வேண்டும்.

• நன்றி: ரவி

மலேசியாவில் மறைமலையடிகள் விழா

மறைமலையடிகளார் தமிழ் மொழிக்கும் சிவ நெறிக்கும்(சைவ சமயம்) 100 ஆண்டுகளுக்கு முன்னர் அருந்தொண்டாற்றியப் பெருமகனார்.

தமிழ், ஆங்கிலம் மற்றும் வடமொழி ஆகிய முமொழிகளில் தலைசிறந்த புலவராவார்.

50 நூல்களை எழுதி தமிழுக்கு அரும்பணியாற்றியவர் மறைமலையடிகளார்.

அடிகளாரின் சிறந்த பணியினை நினைவு கூரும் நோக்கத்துடன் மறைமலையடிகளாரின் நிறைதமிழ் விழா ஏற்பாடு செய்யப்பட்டுள்ளது.

மறைமலையடிகளாரின் நிறைதமிழ் விழா வரும் ஞாயிற்றுக்கிழமை 24.8.2008இல் கோலாலம்பூர் சோமா அரங்கம், விஸ்மா துன் சம்பந்தனில் நடைபெறும். இந்நிகழ்ச்சி காலை மணி 9.00 லிருந்து பிற்பகல் மணி 3.00 வரையில் நடைபெறும்.

இவ்விழா பெட்டாலிங் ஜெயா தமிழ் இளைஞர் மணிமன்ற ஏற்பாட்டில் நடைபெறுகிறது. தமிழ் மக்கள் பெருந்திரளாக வந்து கலந்து கொள்ளுமாறு அழைக்கப்படுகின்றனர்.

• தொடர்புக்கு: சி.ம. இளந்தமிழ் 012-3143910. elantamil@gmail.com

நன்றி:- மலேசியாஇன்று

**************************************************************************

இவர்தான் மறைமலை அடிகள்

தமிழ்க்கடல் மறைமலை அடிகளாரின் பிறந்த நாள் இந்நாள் (1876). தனித்தமிழ் இயக்கத்தின் தந்தை என்று போற்றப்படக் கூடியவர் - ஆரியத்தின் கடும் எதிரி - இந்து மதம் வேறு - தமிழர் சமயம் வேறு என்பதில் உறுதியாக இருந்தவர்.

சென்னைப் பச்சையப்பன் கல்லூரி மண்டபத்தில் 1933 திசம்பர் 23, 24 ஆகிய நாள்களில் தமிழ் அன்பர் மாநாடு நடை பெற்றது. சென்னைப் புத்தகால யப் பிரச்சார சங்கத்தார் இம் மாநாட்டை ஏற்பாடு செய்திருந்த னர். அதன் தலைவர் கே.வி. கிருஷ்ணஸ்வாமி அய்யர், பொக்கிஷதார் எஸ். ராமஸ்வாமி அய்யர், வரவேற்புச் சபைத் தலைவர் உ.வே. சாமிநாதய்யர் மற்றும் பொறுப்பாளர்கள் எல்லாம் பார்ப்பனர்களே. அம்மாநாட்டில் கலந்துகொள்ளுமாறு மறை மலை அடிகளார் அவர்களுக்கு கே.வி. கிருஷ்ணஸ்வாமி அய்யர் 22.12.1933 இல் தந்தி ஒன்றை அனுப்பினார். அதற்கு மறைமலை அடிகள் அளித்த பதில்தான் மிகமிக முக்கியமானது.

கடிதங்கள், அழைப்புகள், தந்தி ஆகியவற்றிற்கெல்லாம் உங்களுக்கும், டாக்டர் உ.வே. சாமிநாதய்யர் அவர்களுக்கும் நன்றி தெரிவிப்பதோடு, தூய தமிழை வளர்க்க விரும்பாத எந்தத் தமிழ்க் கூட்டத்திலும் கலந்துகொள்வதற்கு எமது மனம் இடந்தரவில்லை என்பதை மிகவும் வருத்தத்துடன் தெரிவித்துக் கொள்கிறோம். பண்பட்ட பழைய மொழிகளெல்லாவற்றி லும் தமிழ்மொழி ஒன்றுதான் இன்னும் தன் பண்டை நலஞ் சார்ந்த புகழோடு வாழ்கின்றது. பிற மொழிக் கலப்பு அதன் தூய தன்மையினைக் கெடுக்குமென்றும், அதன் வளர்ச்சியினை குன்றச் செய்யும் என்றும் யாம் உறுதியாக நம்புகின்றோம். ஆதலால் எமது தனித்தமிழ்க் கொள்கையினைக் கடைபிடிக்காத உங்களுடைய மகாநாட்டிலே கலந்துகொள்ள முடியாமையினைப் பொறுத்துக் கொள்வீர்களாக! என்று பதில் எழுதியவர் தான் நமது போற்றுதலுக்கும், மதிப்புக்கும் உரிய தமிழ்க்கடல் மறைமலை அடிகளார் அவர்கள்.

சுவாமி வேதாசலம் என்ற தம் பெயரை மறைமலை அடிகள் என்று மாற்றிக் கொண்டவர். சைவக் கொள்கையால் மாறு பட்டு இருந்தாலும்கூட, தந்தை பெரியார் அவர்களைப் பெரிதும் போற்றி மதித்தவர். இந்தி எதிர்ப் புக்களத்தில் தந்தை பெரியார் அவர்களுக்குத் துணை நின்றவர். தந்தை பெரியார் அவர்களைப் பல்லாவரத்துக்கு அழைத்துச் சென்று தாம் அரிதிற் சேர்த்துக் குவித்த நூல்கள் கொண்ட நூலகத்தைக் காட்டி மகிழ்ந்தவர். அவர் உடலால் மறைந்திருக்கலாம்; தமிழ் உணர்வால் நம்மோடு நிறைந்திருக்கிறார்.

இனம் எது - இனப் பகைவர் யார் என்பதை இனம் பிரித்துக் காட்டிய அந்தத் தமிழ்க் கடலின் நினைவைப் போற்றுவோம்!குறைந்தபட்சம் தமிழன் வீட்டுப் பிள்ளைகளுக்குத் தமிழில் பெயரைச் சூட்டும் உணர்வு கிளர்ந்தெழட்டும் - அதுதான் அந்தப் பெருமகனாருக்கு தமிழர்கள் காட்டும் உண்மையான மதிப்பாகும்.

நன்றி:- மயிலாடன் அவர்கள் (விடுதலை" 15-7-2008 இதழ்)

தமிழின் சிறப்புணர்த்தும் அடைமொழிகள்

1)அந்தமிழ்:- அம் + தமிழ் = அழகிய தமிழ்

2)அருந்தமிழ்:- அருமை + தமிழ் = அருமைபாடுடைய தமிழ்

3)அழகுதமிழ்:- எல்லாவகையிலும் அழகுநலம் மிக்க தமிழ்

4)அமுதத்தமிழ்:- அமுதம் போன்று வாழ்வளிக்கும் தமிழ்

5)அணித்தமிழ்:- அணிநலன்கள் அமைந்த தமிழ், தமிழினம் பெருமிதமுறும் அணியாக இலங்கும் தமிழ்

6)அன்னைத்தமிழ்:- நம் அன்னையாகவும் மொழிகளுக்கெல்லாம் அன்னையாகவும் விளங்கும் தமிழ்

7)இசைத்தமிழ்:- முத்தமிழில் ஒரு பிரிவு (இசை மொழியின் கூறாவது ஏனைய மொழிகளுக்கு இல்லாத சிறப்பு)

8)இயற்றமிழ்:- முத்தமிழின் மற்றொரு பிரிவு. ஆயகலை அறுபத்து நான்கும் அவற்றின் வழிவந்தனவும் உணர்த்தும் அறிவுநூல்கள் அடங்கியது

9)இன்றமிழ்:- இனிக்கும் தமிழ் (ஒலிக்க, உரைக்க, சிந்திக்க, செவிமடுக்க, எழுத, இசைக்க என எதற்கும் இனியது)

10)இன்பத் தமிழ்:- இன்பூட்டும் ஒலியமைப்பும் மொழியமைப்பும் இலக்கண இலக்கிய மரபும் கொண்டு, கற்பவர்க்கு எஞ்ஞான்றும் இன்பம் பயப்பது.

11)எந்தமிழ்:- எம் + தமிழ் (கால்டுவெல், போப்பு போன்ற பிறமொழிச் சான்றோரும், கற்றதும் 'எந்தமிழ்' என்று பெருமித உரிமை பாராட்டும் தமிழ்)

12)உகக்குந்தமிழ்:- மகிழ்ச்சியளிக்கும் தமிழ்

13)ஒண்டமிழ்:- ஒண்மை + தமிழ் (அறிவின் செறிவும் நுட்பமும் கொண்டு ஒளிதரும் தமிழ்)

14)கனித்தமிழ்:- கனிகள் போன்ற இயற்கைச் சுவையுடைய தமிழ்

15)கற்கண்டுத்தமிழ்:- கற்கண்டு கடிதாய் இருப்பினும் சுவைக்கச் சுவைக்கக் கரைந்து இனிமை தருவது போல, அடர்ந்து செறிந்த நிலையிலும் மாந்தமாந்த மேலும் மேலும் இன்பம் பயக்கும் தமிழ்

16)கன்னித் தமிழ்:- எந்நிலையிலும் தனித்தன்மை கெடாமலும் இளமைநலம் குன்றாமலும் விளங்கும் தமிழ்

17)சங்கத்தமிழ்:- மன்னர்களாலும் புலவர்களாலும் சங்கங்கள் அமைத்துப் போற்றி வளர்க்கப்பட்டத் தமிழ்

18)சுடர்தமிழ்:- அறிவுக்கும் உணர்வுக்கும் சுடர்தரும் தமிழ்

19)சுவைத்தமிழ்:- சொற்சுவை, பொருட்சுவை, கலைச்சுவை, கருத்துச்சுவை என எல்லாச் சுவையும் செறிந்தது

20)செந்தமிழ்:- செம்மை + தமிழ் = எல்லா வகையிலும் செம்மை உடையது (செந்தமிழ் தகைமையால் அன்றே செந்தமிழ் எனப்பட்டது தமிழ்)

21)செழுந்தமிழ்:- செழுமை + தமிழ் - வளம் குன்றாத தமிழ்

22)தனித்தமிழ்:- தன்னேரிலாத தனித்தன்மை வாய்ந்த தமிழ்

23)தண்டமிழ்:- தண்மை + தமிழ் - குளிர்ச்சி நிறைந்தது

24)தாய்த்தமிழ்:- தமிழினத்தின் தாயாகவும் மொழிகளுக்கெல்லாம் தாயாகவும் மூலமாகவும் விளங்கும் தமிழ்

25)தீந்தமிழ்:- (தேன் > தேம் > தீம்) இனிமை நிறைந்த தமிழ்

26)தெய்வத்தமிழ்:- தெய்வத்தன்மை வாய்ந்தது

27)தேன்தமிழ்:- நாவுக்கும் செவிக்கும் சிந்தைக்கும் இனிமை பயக்கும் தமிழ்

28)பசுந்தமிழ்:- பசுமை + தமிழ் – என்றும் தொடந்து செழித்து வளரும் தமிழ்

29)பைந்தமிழ்:- பைம்மை + தமிழ் (பசுமை > பைம்மை)

30)பழந்தமிழ்:- பழமையும் தொடக்கமும் அறியாத தொன்மையுடைய தமிழ்

31)பாற்றமிழ்:- பால் + தமிழ் – பால் போன்று தூய்மையிலும் சுவையிலும் தன்மையிலும் இயற்கையானது

32)பாகுதமிழ்:- வெம்மையிலும் வெல்லம் உருகிப் பாகாகி மிகுசுவை தருவது போன்று, காய்தலிலும் கடிதலிலும் நயம் குறையாதது

33)நற்றமிழ்:- நன்மை + தமிழ் – இனிய, எளிய முறையில் எழுதவும் கற்கவும் பேசவும் கருவியாகி நன்மைகள் விளையத் துணைபுரிவது

34)நாடகத்தமிழ்:- முத்தமிழுள் ஒன்று – நாடகத்தின் மெய்ப்பாடுகளை நுட்பமாய் உணர்த்தும் சொல்வளமும் பொருள்வளமும் ஒலிநயமும் நிறைந்தது

35)மாத்தமிழ்:- மா – பெரிய – பெருமைமிக்க தமிழ் (மங்கலப் பொருளுணர்த்தும் உரிச்சொல் மா)

36)முத்தமிழ்:- இயல், இசை, நாடகம் என முத்திறம் கொண்டு அமைந்த தமிழ்

37)வண்டமிழ்:- வண்மை + தமிழ் (வளஞ்செறிந்த தமிழ்)

38)வளர்தமிழ்:- காலந்தொறும் வளர்ந்துகொண்டே வரும் தமிழ்

தரவு: பேராசிரியர் முனைவர் இ.மறைமலை

யாருக்கு.. யார்தான் தெய்வம்? (தமிழமுது 3)

"குலமகட்குத் தெய்வம் கொழுனனே மன்ற

புதல்வர்க்குத் தந்தையும் தாயும் - அறவோர்க்(கு)

அடிகளே தெய்வம் அனைவோர்க்கும் தெய்வம்

இலைமுகப் பைம்பூண் இறை"

-குமர குருபரர்

இப்பாடல் கூறும் கருத்து:-

நல்ல குடியில் பிறந்த கற்புடைய ஒரு பெண்ணுக்கு அவரள் கரம்பற்றும் கணவனே தெய்வம்; பிள்ளைகளுக்குத் தந்தையும் தாயுமே தெய்வமாவர்; அறநெறி நின்று இல்லற வாழ்வில் இனிதே ஈடுபட்டிருபோருக்குப் பற்றறுத்தத் துறவிகள் தெய்வமாவர்; இலையினுடைய நுனி போலப் பசும் பொன்னால் செய்யப்பட்ட அணிகலன்களைக் கொண்ட அரசனே(இறைவனே) அனைவருக்குமான தெய்வமாவான்.

• நன்றி:- தமிழ் மறை தமிழர் நெறி

(அமுது ஊறும்...)

சந்தனக்காடு:- "வீரத்தமிழன் வரலாற்று ஆவணம்"

தமிழ்த் தொலைக்காட்சி உலகின் தலையெழுத்தையே புரட்டிப்போட்டு, இதுவரையில் இல்லாத மாபெரும் புரட்சியை ஏற்படுத்தி, தனக்கென தனியொரு பாணியை உருவாக்கி தமிழின் விழுமியங்களையும் தமிழரின் தொல்மரபுகளையும் உயர்த்திப்பிடித்து, உலகத் தமிழரின் உள்ளமெல்லாம் நீங்கா இடத்தைப் பிடித்துள்ள ஒரே தமிழ்த் தொலைக்காட்சி மக்கள் தொலைக்காட்சிதான்.

தமிழுக்கும், தமிழருக்கும், தமிழ் கலை பண்பாட்டுக்கும் முன்னுரிமை கொடுப்பதோடு, மருந்துக்குக்கூட 'சினிமா' எனப்படும் திரைப்படக் குப்பைகளுக்கு அறவே இடம் கொடுக்காமல் மிக வெற்றிகரமாகச் செயல்பட்டு உலகத்தமிழ் நேயர்கள் அனைவரது ஒட்டுமொத்த பாராட்டுதலையும் வாரிக்குவித்துக் கொண்டிருக்கிறது மக்கள் தொலைக்காட்சி.

இப்படிப்பட்ட அருமைமிகு தமிழ்த் தொலைக்காட்சிக்கு மகுடம் வைத்ததுபோல அமைந்த நிகழ்ச்சிகளில் மிக முதன்மையானது 'சந்தனக்காடு' தொடர்தான் என்றால் மிகையன்று. தமிழகம், மலேசியா, எத்தியோப்பியா, துபாய், ஆத்திரேலியா, கனடா உள்ளிட்ட அயல்நாடுகளில் வாழும் தமிழரின் பெருத்த ஆதரவோடு இத்தொடர் மிக வெற்றிகரமாக ஒளிபரப்பாகி இப்போது நிறைவடைந்துள்ளது. 'சந்தனக்காடு' தொடர் வீரப்பனின் வாழ்க்கையைக் காட்டும் மிகச்சிறந்த காவியமாக உலகத் தமிழ்மக்கள் மனதில் இடம்பெற்றுள்ளது. இரண்டாயிரம் ஆண்டுகளாகக் காணாமல் போயிருந்த தமிழனின் வீரத்தையும் மறத்தனத்தையும் தூசுதட்டி பளிச்செனக் காட்டி தமிழின வரலாற்றில் தடம் பதித்துள்ளது.

சந்தனக் கடத்தல்காரன் என்று உலகத்திற்குச் சொல்லப்பட்ட வீரப்பனின் வாழ்க்கையை ஒளிவுமறைவின்றி வெளிப்படுத்திய இந்தத் தொடரை, மிகச் சிறந்த ஒரு திரைப்படத்துக்குரிய நேர்த்தியோடு இயக்கியவர் இயக்குநர் வ.கெளதமன். மகிழன் கலைக்கூடம் நிறுவனம், ஒரு வனமும் இனமும் சிதைந்த இந்தக் கதையைக் காவியமாக வழங்கியது.

தமிழனின் வீரமரபை வெளிப்படுத்தியத் தொடர்

உலக நாகரிக வெள்ளத்தில் கரைந்துபோய்விட்ட ஒவ்வொரு தமிழனின் உள்ளத்திலும் மிகமிக அடித்தளத்தில் கண்டுபிடிக்க முடியாத ஒரு இருண்ட மூளையில் எள்மூக்கு அளவுக்கு ஒட்டிக்கொண்டிருக்கும் 'தமிழன்' என்ற உணர்வையும் 'தமிழ்' என்ற உணர்ச்சியையும் 'சந்தனக்காடு' தட்டியெழுப்பியிருக்கிறது என்று துணிந்து சொல்லலாம். அந்த அளவுக்குச் சிறுவர்கள் முதல் பெண்களும் பெரியவர்களுமாக, தொடக்கநாள் முதல் இறுதிநாள் வரை ஒவ்வொரு நாளும் தவறாமல் இந்தத் தொடரைப் பார்த்தவர்கள் ஏராளம் ஏராளம்!

'சந்தனக்காடு' தொலைக்காட்சியில் தொடராக வருகின்ற நாள்வரையில் வீரப்பன் என்ற ஒரு வீரத்தமிழனின் வரலாற்றைத் தமிழர்கள் எல்லாருமே தப்பும் தவறுமாகத்தான் அறிந்து வைத்திருந்தனர். வீரப்பனின் உண்மை வரலாற்றை; ஒரு மறத்தமிழனின் வீரவரலாற்றை இந்தத் தொடர் வெளிச்சம் போட்டுக் காட்டியுள்ளது. இது வெறும் சின்னத்திரைத் தொடரல்ல. ஒரு வனத்தின் நடுவில் இருந்துகொண்டு தமிழையும் தமிழரையும் காப்பதற்குப் போராடிய வீரத்தமிழர் பற்றிய வரலாற்று ஆவணம்! 'சந்தனக்காடு' மட்டும் வராமல் இருந்திருந்தால் ஒரு வீரத்தமிழனின் போராட்டம் உலகத்திற்குத் தெரியாமலே போயிருக்கும்.

சந்தனக்காடு ஏற்படுத்திய தாக்கங்கள்

இந்தத் தொடரைக் கண்டுகளித்தோம் என்று சொல்லுவதை விட, வீரப்பனோடு வாழ்ந்திருந்தோம் என்று சொல்லும் அளவுக்குக் கதைக்குள்ளே நம்மையும் இழுத்து வைத்துக்கொண்டது 'சந்தனக்காடு'. வீரப்பன் சிரிக்கும்போது சிரித்து.. அழும்போது அழுது.. கோபப்பட்டபோது கோபித்து.. வெகுண்டு எழுந்தபோது எழுந்து.. நெஞ்சுயர்த்தி நின்றபோது நின்று என வீரப்பனோடு நம்மையும் பிணைத்துவைத்த காட்சிகள்தாம் எத்தனை எத்தனை!

வீரப்பன் அடிபட்ட போதெல்லாம் நமக்கும் வலித்தது..! வீரப்பன் அடி கொடுத்த போதெல்லாம் நமக்கும் நரம்பெல்லாம் முறுக்கேரியது..! வீரப்பன் காதலில் வெட்கப்பட்ட போதெல்லாம் நமக்கும் கூச்சமாயிருந்தது..! வீரப்பன் பிடிபட்டபோது அவனைக் காப்பாற்ற நமது தோளும் துடித்தெழுந்தது..! வீரப்பனுக்குக் கொடுமைகள் இழைக்கப்பட்ட போது நமது இரத்தமும் சூடேரியது..! வீரப்பன் கொல்லப்பட்ட போது நம்முடைய உடன்பிறப்பொன்று பிரிவது போல நமது உயிரும் கலங்கியது..! இப்படி எண்ணற்ற பாதிப்புகளை நமக்குள்ளே இந்தச் 'சந்தனக்காடு' ஏற்படுத்தியது உண்மையிலும் உண்மை!

அதுமட்டுமா? தமிழர்கள் கொடுரமாகக் கொல்லப்படும் ஒவ்வொரு காட்சியிலும், தமிழ்ப் பெண்கள் பாலியல் வல்லுறவுக்கு உள்ளாகும் காட்சியிலும், தமிழ்க் குடும்பங்களும் குழந்தைகளும் கன்னட வெறியர்களால் தாக்கப்படும் காட்சியிலும், இனவெறிபிடித்த கன்னடர்கள் கோரத்தாண்டவம் ஆடும் காட்சியிலும் நமக்குள்ளே நான் தமிழன்.. என் மொழி தமிழ்.. என்ற உணர்ச்சி மீண்டும் மீண்டும் பொங்கிக்கொண்டே இருந்தது! நமது உரிமையை அஞசாமல் கேட்க வேண்டும்; மொழி இனத்தை முன்னின்று காக்க வேண்டும்; சொந்த மண்ணைப் போராடியாகிலும் மீட்க வேண்டும் என்ற உணர்வுகள் புதுப்பிக்கப்பட்டுள்ளன!

அவிழ்ந்து போன மர்ம முடிச்சுகள்

மொழிப்பற்றும் இனப்பற்றும் தாய்மண் பற்றும் மாந்தநேயமும் நேர்மையும் உண்மை உணர்வும் கொண்ட வீரப்பன் ஏன்? எப்படி? யாரால்? எதனால்? எதற்காக? கொலைக் குற்றவாளியானான் என்பதை இந்தக் காவியம் மிகத் தெளிவாக நமக்குக் காட்டிவிட்டது. வீரப்பன் நிலையில் இருக்கின்ற எவரும் கண்டிப்பாகக் குற்றவாளியாக மாறியே ஆவார்கள். சட்டத்தின் பார்வைக்குத்தான் வீரப்பன் குற்றவாளியே தவிர ஓர் இனப்போராட்டத்தின் பார்வையில் அவன் ஈடு இணையற்ற ஒரு போராளி என்பதை இந்தத் தொடர் நிறுவியுள்ளது.

மேலும், ஒவ்வொரு தொடரின் இறுதியிலும் வீரப்பனோடு வாழ்ந்திருந்த பொதுமக்களைப் பேசவைத்து அவர்களின் பட்டறிவைப் படமாக்கியிருப்பதானது, 'சந்தனக்காடு' தொடரில் வரும் கதைகளும் நிகழ்வுகளும் உண்மையானவை என்பதை உறுதிபடுத்துவதாக அமைந்தது. அவ்வாறு பேசியவர்கள் சொன்ன கண்ணீர்; செந்நீர்; வீரதீரக் கதைகளிலிருந்து வீரப்பனை நாம் இன்னும் ஆழமாகப் புரிந்துகொள்ள முடிந்தது. அதோடு, அதிகாரக் கூட்டத்தினரும், இன வெறியர்களும், காவல் அதிகாரிகளும் பண்ணிய கொடுமைகள், பொய்ப் பித்தலாட்டங்கள், சட்டத்திற்குப் புறம்பான செயல்கள், கொலைவெறித்தனங்கள் என அனைத்தையும் அப்பட்டமாகத் தெரிந்துகொள்ள முடிந்தது.

மொத்தத்தில், இந்தத் தொடரானது நமது தமிழ் மொழிக்கும் இனத்துக்கும் நாட்டுக்கும் ஏற்பட்ட; ஏற்படுகின்ற; ஏற்படப்போகும் இன்னல்களையும் இடர்களையும் நன்றாகவே எடுத்துக் காட்டியுள்ளது. இந்தத் தொடரானது மிகப்பெரிய அளவில் மொழி, இன, நாட்டு உணர்வை ஊட்டியுள்ளது. தூங்கிக் கிடக்கும் தமிழ் மக்களைத் தட்டி எழுப்பியுள்ளது. தமிழரிடையே மிகப்பெரிய விழிப்புணர்வை ஏற்படுத்தியதோடு அடுத்த தலைமுறைக்காக நாம் செய்யவேண்டிய முன்னேற்பாடுகளைப் பற்றிய சிந்தனைகளைத் தூண்டியுள்ளது.

திரைப்பட – சின்னத்திரைப் போக்கையே புரட்டிப்போட்ட புதுமைப் படைப்பு

காலங்காலமாக, நாயகர்களின் அதிரடியையும், நடிகைகளின் குலுக்கலையும், நகைச்சுவை என்ற பெயரில் கோணங்கித்தனத்தையும், இரட்டைப் பொருள்தரும் உரையாடலையும், ஆங்கிலம் கலந்த ஆர்ப்பாட்டமான பாடலையும் திரும்பத் திரும்பப் பரிமாறி, தமிழனின் மனத்தையும் மானத்தையும் தமிழ்த் திரப்படங்கள் (சினிமா) கெடுத்துவந்தன. இப்படி, திரைப்படங்கள் தின்றுத்துப்பிய எச்சில்களையே பின்னர்வந்த சின்னத்திரைத் தொடர்களும் மக்களுக்குப் பரிமாறின. இரண்டு மனைவி கதை, மூன்று பெண்டாட்டிக்காரன் கதை, அண்ணியை அடைய நினக்கும் தம்பி, கணவனையே கொல்ல சதிசெய்யும் மனைவி என ஒழுக்கங்கெட்ட வட்டத்திலேயே செக்குமாடுபோல சுற்றிவந்த சின்னத்திரையில் 'சந்தனக்காடு' இயக்குநர் வ.கௌதமன் புதிய பரிணாமத்தைக் ஏற்படுத்தி சாதனை செய்துள்ளார்.

திரைப்படம் – சின்னத்திரை இரண்டின் ஆதிக்கத்தை வீரப்பனின் தோட்டா வேட்டையாடி தூள்தூளாக்கிவிட்டது. திரைப்படம் – சின்னத்திரை இரண்டும் எழுப்பி வைத்திருந்த கனவுக் கோட்டையைச் 'சந்தனக்காடு' தகர்த்து தரைமட்டமாக்கிவிட்டது.

இரவுப் பகல் பாராமல், காடுமேடு பாராமல், பசிப்பட்டினி பாராமல், ஊண் உரக்கம் பாராமல் தான் பிறந்த தமிழினத்தின் நலன் ஒன்றையே குறியாகக் கொண்டு 36 ஆண்டுகள் சந்தனக்காட்டில் மறைந்து வாழ்ந்து, ஆனால் உலகம் முழுக்க பெரும் பரபரப்பு ஏற்படுத்திய வீரப்பன் என்ற ஒரு வீரத்தமிழன் வாழ்க்கையை அதனதன் நிகழ்விடத்திலேயே பதிவுசெய்து நமக்கெல்லாம் வழங்கிய இயக்குநர் வ.கௌதமனுக்கும், மகிழன் கலைக்கூடத்திற்கும், மக்கள் தொலைக்காட்சிக்கும் உலகத் தமிழர் அனைவரும் நன்றிசொல்ல வேண்டியது முதன்மைக் கடமையாகும். வீரப்பனின் வீர வரலாற்றை ஒளிக்காப்பியமாக உருவாக்கி இன்றைய இளைஞர்களுக்குப் பாடமாகவும் நாளைய தலைமுறைக்கு ஆவணமாகவும் ஆக்கியிருக்கும் இந்தக் கூட்டணியை உண்மைத் தமிழர் என்றென்றும் போற்றுவர்.

தனித்தமிழ் விசைப்பலகை

கணினிக்குள் தமிழ் என்பது ஒரு காலத்தில் நினைத்துக்கூட பார்க்க முடியாத ஒரு செயலாக இருந்தது. ஆனால், இன்றோ கணினியிலும் இணையத்திலும் ஆங்கிலத்திற்கு இணையாக அனைத்துப் பணிகளையும் செய்யக்கூடிய அளவுக்குத் தமிழ் முன்னேறியுள்ளது.

கணினி மென்பொருள் உலகிலும் இணையத்திலும் தனக்கென தனியாக ஒரு தொழிநுட்பத்தையே உருவாக்கிக்கொண்டு உலகையே வலம் வந்துகொண்டிருக்கிறது தமிழ்மொழி. நிகழ்கால நூற்றாண்டில் தமிழ் அடைந்திருக்கும் இந்த மாபெரும் வெற்றிக்கு வித்திட்ட கணித்தமிழ் வல்லுநர்களை தமிழ்க்கூறும் நல்லுலகம் கைகூப்பித் தொழுதல் வேண்டும்.

கணித்தமிழ் உலகில் ஆகக் கடைசியாக நிகழ்ந்துள்ள சாதனையொன்று உலகத் தமிழரையே வியக்கச் செய்துள்ளது. குறிப்பாக, தனித்தமிழ்ப் பற்றாளர்களை மனங்குளிர வைத்துள்ளது.

ஆம்! கணினியில் தட்டச்சு செய்யும்போது கிரந்த எழுத்துகள் அறவே தலைக்காட்டாமல் இருக்க புதியதாக ஒரு விசைப்பலகைக் கண்டுபிடிக்கப்பட்டுள்ளது. அதன் விவரம் பின்வருமாறு:- (ரவி வலைப்பதிவிலிருந்து...)

*********************************************************

ஸ, ஷ, ஜ, ஹ, க்ஷ, ஸ்ரீ போன்ற கிரந்தம் உள்ளிட்ட தமிழ் அல்லாத பிற எழுத்துகள் நீங்கிய எழுத்து முறையைத் தனித்தமிழ் எனலாம்.

ஒருங்குறியில் அமைந்த பாமினி, அஞ்சல், தமிழ்99 விசைப்பலகைகளுக்கு NHM Writer ல் பயன்படுத்தக்கூடிய தனித்தமிழ் xml கோப்புகள் செய்து பார்த்தேன். (இதைச் செய்ய NHM Writer Developer Kit உதவியது. இதன் மூலம் இந்த xml கோப்புகளைத் தொகுப்பது, புதிதாக உருவாக்குவது இலகுவாக இருக்கிறது. விரைவில் இதைப் பொதுப் பயன்பாடுக்கு வெளியிடுவார்கள்)

இவற்றை http://ravidreams.net/files/thani-tamil-keyboards.rar என்ற முகவரியில் இருந்து பெற்றுக் கொள்ளலாம்.

தனித்தமிழ் விசைப்பலகையால் என்ன பயன்?

*எனக்கு கிரந்தம் தவிர்த்து தனித்தமிழில் எழுத ஆவல். ஆனால், தட்டச்சு மென்பொருளில் கிரந்தம் இருப்பதால் பழக்கம் காரணமாக அதைப் பயன்படுத்தத் தூண்டுகிறது. இனி தவிர்க்கலாம்.

*தனித்தமிழ் ஆர்வலர்களின் பயன்பாட்டுக்கும், தனித்தமிழ் பரப்பவும் இந்தக் கோப்புகள் உதவலாம்.

*எங்காவது கிரந்தம் தவிர்த்து எழுதினால், ” நீ எப்படி கிரந்தம் தவிர்த்து எழுதலாம்” என்று கேட்கிறார்கள். “ஐயா, அம்மா, என் மொழியிலும் அதை எழுத நான் பயன்படுத்தும் மென்பொருளிலும் கிரந்தம் இல்லை” என்று சொல்வது இலகுவான விடையாக இருக்கும் தமிழில் எழுத மென்பொருள் இல்லையென்று தமிங்கிலத்தில் எழுதுபவர்களை ஏற்றுக் கொள்ளும் போது இதையும் ஏற்றுக் கொள்வார்கள் தானே..!

• நன்றி:- ரவி